பதுளையை தாக்கியது மினி சூறாவளி.

பதுளை மாவட்டத்தின் பல பகுதிகளில் நேற்றிரவு வீசிய மினி சூறாவளியினால் நூற்றுக்கணக்கான மக்கள் பாதிக்கப்பட்டுள்ளதாக இடர்முகாமைத்துவ நிலையம் தெரிவிக்கின்றது.

கடும் காற்றுடனான வானிலையினால் பல குடியிருப்புகளில் கூரைத்தகடுகள் அள்ளுண்டு சென்றுள்ளதாக எமது செய்தியாளர் தெரிவிக்கின்றார்.

மரங்கள் முறிந்து வீழ்ந்துள்ளமையினால் போக்குவரத்து தடைகளும் ஏற்பட்டிருப்பதாக அவர் குறிப்பிடுகின்றார்.

பசறை – நமுனுகுல பிரதான வீதி,

பிபிலகம – பசறை வீதிகளில் மரங்கள் முறிந்து விழுந்தமையால் போக்குவரத்து தடை ஏற்பட்டுள்ளது.

படல்கும்புர பிரதேச கமேவெல நான்காம் கடை பகுதியில் லயன்குடியிருப்புகள் சேதமடைந்துள்ளன.

லுணுகல – ஜனதாபுர பகுதியில் மின்கம்பம் உடைந்து வீதியில் விழுந்தமையால் போக்குவரத்து தடைப்பட்டுள்ளது.

பசறை – லுணுகல பிரதேசங்களில் மின்சார தடை ஏற்பட்டுள்ளதாக தெரிவிக்கப்படுகின்றது.

இதனால், பொதுமக்களின் இயல்பு வாழ்க்கை  பாதிக்கப்பட்டுள்ளதாக செய்தியாளர் குறிப்பிடுகின்றார்.

செந்தில் தொண்டமான் விடுத்த பணிப்புரை

பசறை – லுணுகலை உட்பட்ட தோட்டப் பகுதிகளில் நேற்றிரவு முதல் திடீரென வீசிவரும் பலத்த காற்று காரணமாக பாதிக்கப்பட்டுள்ள மக்களுக்கு உடனடியாக உதவிகளை வழங்குமாறு மாவட்ட அதிபருக்கு இ.தொ.கா தலைவர் செந்தில் தொண்டமான் பணிப்புரை விடுத்துள்ளார்.

வீடுகளுக்கு ஏற்பட்டுள்ள சேதம் காரணமாக பாதிக்கப்பட்டுள்ள மக்களை மாற்று இடங்களில் தங்கவைப்பதுடன் அவர்களுக்கான உலர் உணவுகளை வழங்க நடவடிக்கைகளை மேற்கொள்வதோடு,சேதமடைந்த வீடுகளை சீர்திருத்துவதற்கான நடவடிக்கை எடுக்குமாறும்

செந்தில் தொண்டமான் பணிப்புரை வழங்கியுள்ளார்.

அத்துடன் இப்பகுதிகளில் உள்ள பாடசாலைகளுக்கும் பாதிப்பு ஏற்பட்டுள்ளது. மாணவர்களின் பாதுகாப்பை கருத்திற்கொண்டு, பாடசாலையை சீர்திருத்துவதற்கான உரிய நடவடிக்கைகளை எடுக்குமாறு ஊவா மாகாண செயலாளருக்கும் பணிப்புரை வழங்கியுள்ளார்.

✶✶⊶⊷⊷❍ 𝑰𝑻𝑴 ❍⊶⊶⊷✶✶